DIQLƏ AMUƏZO 

 Şatə Şali Masəlluədə fəhlə ko kardə, dasteyən xeyzonıj hısde. Bəşdə so roj ni, dı amuəzo Yavəri soy dəvardə. Co tərəfiku ro okırniye mumkun ni, dı tərəfıj hamsuə soe, i tərəfən rıje. Yavərən hamsuə diədə dəlok ko kardə. Maşdə şedə bə ko, dışdə masxori nimeyjə bardə, şanqovəsə dast oşande- oşande omedə bəkə. 
 Şatə Şali ha ruj şanqovəsey, koy bədiqə dəşdə bə Masəllu vıjor, axşambazari bə ucuzə ğeymət i zambul ləlı -qıl, şini-mini sedə omedə. Qılejən bışdə ləvoj hısdıbe, zanbuliən dəne bə ləvo,əne ışdə amisə, dəvardi dı Yavəri soy. Arədə əğlon vindeyədə, dəvon  sə-zıvon əke, bəvon qıle sef, qıle şini eyədoşdi. Həm çokə hamsuə be, həmən çokə amuəzo be. 
 Jenən hejo dı Yavəri bə pıt-pıte: Tı çı merdij? Merd bəne şatə Şali bəbe, ha ruj vıjori qırdə kardə, i zambul xıçcəmə boşdə əğlon hardı- həş vardə, jeni ışdə dasi dılədə noğo doydə. Şinə zıvonıjən mori çı lonədə bebəkay. Şanqovəsə əğlon pıə roy çəş kardən, tınən ləxe-ləxe das bəsə q...n dıroz, omedəj bəsə əmə. 
 İ ruj, dı ruj, manqi, sori, jen bəne heyvəron hejo kudə bə Yavəri sə. Yavər rujiən bə xırtə rəsdə, vində amuəzo omedə, inən zanbul çey amədə, omedə çey roy pebıridə, votdə:Ha Şalia 
- Con amuəzo 
 - Işdı ın merıs mandə zambul, boçımı sey bəlo bıə, vid-fəsonım bəsə tı çok, çımı tono bə şəğoli oxşəş doydəj, hejo bəçımı sə kudən, votdən topə Şatə Şaliən nij. İ kərən tıni dı purə zambuli çımı soyku dəvardiədə bıvindom, ışdı lınqi barışdem, yaan boşdə co ro pedokə. 
 Şali ve lovə kardə:  Amuəzo, bəşdı ğıbon, çəmə dədə-babə ro çığıne, az telə das bə daste xeyzoni dılə çokne bom? Yavər bə hiç lay-lay omandəni, votdə: Kırt, mı ışdə sıxanım vote, berdəmədə i kərən dı zambuli dəvardij, çəmə arə dı sio bıri parçin bəkam. 
 Çə rujnəku fəğırə Şali, rıji tərəfdə qıle 15 metrəlığə jiəj ehaşdə, jiə pentonoən 2-3 qılə kənservə ğotij dəbastə, koədə oməsə, rıjiku zambuli pevunidə bə jiə, oşandə, kənservə ğotion sədo kardən, jen omedə, okırnidə bəpe. Işdən sakit, dasdi oşande-oşande dəvardə Yavəri soyku. Yavəri əğlonən dışdə kanə vərdışi, Şali koədə omə vaxti evoydən bə so, əncəx həni nə sef ni, nə şini...

 20 01 2021 ci il        ADİ.