ҺЕСТЕ

Фәхыр мәкә, еј выл, мәвот, ки гыләј чимәным һесте,

Быдә аз фәхыр быкәм ки, Толышә вәтәным һесте!

Пијо Деғе, жијо Мығон, мијонәдә Хани Ланкон,

Чымы зәмин, чымы дыјо, геш-гешә кәфшәным һесте!

Һаканә дылым дәжедә, ки зандедә ы номердон?

Һич бәштә ағыл нәвәјм ки, анәдә нәгбәтым һесте!

Кејнә чән бомен бебәшен, сыхани бә дим бәвотен?

Шәв-руж бә фикир-хыјолим, чан парсе бәштәным һесте!

Боән, бәрмалә бывотән, бочи озод ныбу Толыш?!

Бә толышон вотедәм ки, ым парсән бәшмәным һесте!

Чы рәрә јодо бешинхо

чәмә анәдә шәһидон?

Әвон озоди шәһидин,

боәвон рәһмәтым һесте!

Чандә толыш һозыје ки,

быдә ҹон хәлғи роәдә,

Бәчәмә һәзо ҹывонон

вотәнин әһсәным һесте!

Деғыжим, чанә бывотым,

бовә быкә бәмы Толыш.

Мардеку бочи бытарсым, һозыә кәфәным һесте!

Дегыж