Im qıləy mənəvi tıbəye, pire

Im qıləy mənəvi tıbəye, pire

Qətəşe bə vənqo har sıği, har do

Hıri bandon sədə bastəşe lonə

Kənoku mandedə bə sipyə çodo

Xıçon əy randedən qırd bənə şonə

Bo həyvon, pərəndon hır bənə qıfo

Iştə dastonədə loknedə vişə

Subhi şığ bəvonro ən xosə nəfo

Dəy ruji okardən xımbu, vənəşə

Həyvonon hıtedən çəy jiyo şin-şin

Oğandən ıştəsə pambəynə lefi

Niyobən həməku, hırədə bən gin

Dılışon rohəte, kardedən kehvi

Çanədə bımədə rəvoş, reç heste

Kom şair bəkarde əçəy təsviri

Bınəv dınyo dimi hey haste-haste

Tı iyo bıvindeş vəşti tispiri

Im qıləy mecuzə, ım qıləy sırre

Bə kəşə Rəssomi eqındə əhsən

Im qıləy mənəvi tıbəye, pire

Bə çəmə məholi kardəşe ehson

2018

Aqşin Tarıxi