Bımand, məşi bəştı ğıbon!

Bə Yusif Abbasov i "Boy, bışəmon çı dınyoku" şeiri cəvob:

Çı dınyoku boy, ta məkə

Bımand, məşi, bəştı ğıbon!

Əkı-qırəy vəsse, səkə,

Bardə xəşi, bəştı ğıbon.

Deştə piyəy omə nimon,

Deştə piyəy səbu jimon.

Kali, i ruj əmə nimon,

Məğət pəşi, bəştı ğıbon.

Çandə kəson dınyoku şin,

Jo məzın çı dınyo beşin.

Ovşımi bə şəvon ruşin-

Kardə həşi, bəştı ğıbon.

Əhrimən har çi kardedə,

Ahurəməzda bardedə¹.

Rosti zik rə peqardedə

Bə otəşi, bəştı ğıbon.

Beşedəni səm ve dino,

Vəyştən iyoy, həmən fino,

Şairon ka ənnə zino

Deştə çəşi, bəştı ğıbon!

Çı dınyoku çokoj şedə?

Kərəntine har co, bədə.

Ohil-cohil nıştə kədə

Vəşi-təşi, bəştı ğıbon.

Məmand dınyo tı noqırə

Hejo jıqoy bə ım vırə.

Hejo hə şə dumoj kırə,

Bə sə dəşi, bəştı ğıbon.

Mirfayaz Likmekani

03.01.2021