Rıvos iyən hırs

Hırs çı vişə bələdiyyə sədr ko kardedəbe ,

Əqəm həxi bıvotom , ıştə ko çok bardedəbe ,

Rıvosi Hırsış i ruj barde bo harde peşome ,

Əçey kardə ım dəvət bə Hırsi ve xoş ome .

Okardışe kə soybi qıləy yolə dəstorxon ,

Vardışe bə miyonə ləvəngi moy, pılo ,

şon ...

De zambuliş noy əno ,sef ,ambu ,anqı tojə ,

Gitə - gitə vardışe mıv , bili iyən kijə .

Hırsi ım dəstərxoni hardonış jey bəyəndı ,

Mizi səpe çiç hestbe ebardşe dumoyəndı...

Bo işto okardeyo jeyşe ərəğ de tırşə ,

Pıloş ğəzəndə harde , anqı hejo de huşə ..

Peşo harde - peşome Rıvos bə mətləb ome :

- ,, Hırs mamu , zındəş tınım boçiro vankardəme ?

Bəmıən ıştə palu qıləy qədə ko bıdə ,

Iştə sə bıqordonyım vişə bələdiyyədə ."

Hırs rozi be dı şərti : - ,,Əqəm ha həftəsədə

Qıləy jıqo miz okoş , ko bəkamon ivrədə ."

Çı şımə sə bıdojnım , Rıvos bımi ve şo be ,

Şıpluzə Hırs əçeyku xeyləki rozi co be .

Rıvosi bino karde bo zəminon həvate ,

Bə şir - pələnq oqarde , məxloğati roş qəte.

Ki damə be Rıvosi doy əy qəte bə sıpon

Ki , i kərən vişədə hiç ki məkəy co qəpon.

İnən de kanə ğaydə çoko həftə sə ome,

Hırs şedəbe Rıvosi kəy bo harde - peşome.

Se - ço manq dənıvarde sıpon Hırsışon qəte ,

Kəxərobi zoəşon bə ,, kpz " eqəte .

Oşko be ki , Rıvosi vişəj jə bə iyəndı ,

Çanə heyvoni lonəş həvatə dumoyəndı .

Xeyli parçinış kəşə əy çı vişə dırozi ,

Isə vişə məxloğat həmmə çəyku nırozin ,

Dumə bə dast doydəni bə hiç ki qədə Rıvos ,

Fitot qordıniyedə vişə dılədə Rıvos .

Rıvosi kardə koon səbəbşon vinde çəyku ,

,, Bəbolə " Hırsışon jey , bekardışone çı koyku .

Vindışe ko xərobe , rə - di bəqəten əvi ,

Bə qıləy diyəro vişə Rıvos vite de şəvi .

Vote zıne əzınim , çandi - çand sor dəvarde ,

Hırs xıvvət , xəcolətin ıştə lonədə marde .

Çı Hırsi marde xəbə pevolo be bə vişon ,

De çəşə asti qullə pur bin Rıvosi çəşon,

Qıləy papruz sutnişe , şe bə dumot , votışe :

- ,, Hırs mamu çokə merd be, bəştə luzi ğıbon şe ."

Bəhram Şəms 

18.11.2020