Əve şe-şe kam bedəmon

Nom bə hesob vardənimon,
Bə eli soyb mandənimon,
Dusti tono qardənimon;
De co xəlqon cəm bedəmon,
Əve şe-şe kam bedəmon.

Həvyedəmon, qınedəmon,
Deşmeni dust zınedəmon,
Har tojə ruj zinədəmon 
Penışoməy, dəm bedəmon,
Əve şe-şe kam bedəmon

Nəvedəmon fırsətiro,
Bıbırəmon çı yəndı ro.
Bə i yəndı qəvədə bo -
Peşto lınqi kandedəmon,
Əve şe-şe kam bedəmon.

Nuperəson kovıl, əvom;
Yolon roy kardənin dəvom.
Ni çı dardi hico dəvo,
Befərə son zandedəmon,
Əve şe-şe kam bedəmon.

Vaxt dəvardə yol bedəmon,
Toğə bimon- xol bedəmon,
Rəsdənimon- kol bedəmon,
Pi bedəmon, xom bedəmon,
Əve şe-şe kam bedəmon.

Hey bo yadon vəşedəmon,
Bənə həşi beşedəmon,
Pemedəmon, eşedəmon;
Ov bedəmon, şom bedəmon,
Əve şe-şe kam bedəmon.

Bə ha votəy mandedəmon,
Sa cur nəğmə handedəmon.
Çı yəndı kəy ğandedəmon.
Bemolyət, erjon bedəmon,
Əve şe-şe kam bedəmon.

Aqşin, ıştə dıli məkand,
Bı həxə ko xəlqi vanqkard.
Popoki, Həzi şəy tankard,
Bıvind i pərçəm bedəmon,
Nıbəvoteş, kam bedəmon.

Aqşin Tarıxi